Protestë simbolike për mbrojtjen e jetës tradicionale në Bjeshkët e Nemuna

Protesta do të mbahet të martën, më 2 qershor 2026, nga ora 11:00, te rampa (Laura) e Parkut Kombëtar në Grykën e Deçanit

Banorë të zonës, bjeshkatarë, guida malore, pronarë stanesh dhe operatorë turistikë kanë paralajmëruar një protestë simbolike kundër vendimit të Ministrisë së Mjedisit për ndalimin e transportit të materialeve ndërtimore në Parkun Kombëtar “Bjeshkët e Nemuna”.

Protesta do të mbahet të martën, më 2 qershor 2026, nga ora 11:00, te rampa (Laura) e Parkut Kombëtar në Grykën e Deçanit.

Organizatorët thonë se banorët e këtyre bjeshkëve nuk janë kundër natyrës, por pjesë e saj, duke theksuar se jeta në stanet alpine dhe tradita e blegtorisë ekzistojnë prej brezash në këtë zonë.

Sipas tyre, ndalimi i transportit të materialeve ndërtimore vështirëson mirëmbajtjen e stanëve ekzistuese dhe ndikon drejtpërdrejt në jetën e banorëve lokalë dhe zhvillimin e turizmit malor.

Përmes kësaj proteste simbolike, ata kërkojnë:

• ruajtjen e jetës tradicionale në bjeshkë,
• mundësi për mirëmbajtjen e staneve ekzistuese,
• mbështetje për turizmin malor dhe banorët lokalë,
• si dhe dialog institucional për zgjidhje konkrete.

“Bjeshka pa njerëz nuk mbrohet, braktiset”, thuhet në thirrjen publike të organizatorëve.

---