Pse frangu dhe dollari vazhdojnë ta sfidojnë vlerën e euros?

Frangu zviceran dhe dollari në nivelin më të fortë kundrejt euros

Në 24 orët e fundit frangu zvicerane ende po qëndron në nivelin më të fortë kundrejt euros që nga viti 2015, me 1 € në 0,9875 CHF, ndërkohë që 1 euro është e barabartë me 1 dollar, shkruan albinfo.ch.

Sipas kursit zyrtar të këmbimit valutor, frangu dhe dollari këmbehen lart në raport me euron, krahasuar me vitet e tjera, që të dy monedhat kishin vlerë dukshëm më të madhe.

Duket se frika e recesionit në kontinent tashmë është rritur edhe më shumë, e nxitur nga inflacioni i lartë dhe pasiguria e furnizimit me energji të shkaktuar nga pushtimi i Ukrainës nga Rusia.

Ndërkohë Bashkimi Evropian po përpiqet të zvogëlojë varësinë e tij nga nafta dhe gazi rus dhe në të njëjtën kohë, Rusia ka frenuar furnizimet me gaz për disa vende të BE-së dhe ka ulur rrjedhën në tubacionin Nord Stream për në Gjermani me 60%.

Tani ajo pjesë kritike e infrastrukturës së importit të gazit në Evropë, është e mbyllur për një proces të shkurtër mirëmbajtjeje. Zyrtarët gjermanë kanë frikë se mund të mos ndizet më.

Kriza energjetike vjen së bashku me një ngadalësim ekonomik, i cili ka hedhur dyshime nëse Banka Qendrore Evropiane mund të shtrëngojë në mënyrë adekuate politikën për të ulur inflacionin.

Një seri rritjesh agresive të normave të interesit nga bankat qendrore, duke përfshirë Fed-in amerikan, do të mbajnë presionin mbi euron, ndërsa do t’i dërgojnë investitorët drejt dollarit amerikan si një strehë të sigurt, thonë analistët.

Rezerva Federale e SHBA-së është shumë përpara Europës për sa i përket shtrëngimit, pasi ka rritur normat e interesit me 75 pikë bazë, ndërsa tregon se më shumë rritje të normave do të vijnë këtë muaj.

 

 

 

---