Publikohet fotografia e Këshillit Federal me ministrin e ri, Cassis

Për shkak të ndryshimit me ardhjen e ministrit Cassis, Kancelaria Federale ka publikuar sot fotografinë e re, të aktualizuar të vitit 2017, të Këshillit Federal

Sot, më 1 nëntor, Këshillit Federal ose qeverisë së vendit i është  bashkuar ministri i ri, Ignazio Cassis, i cili ka zënë vendin e tashmë ish ministrit të dorëhequr, Didier Burkhalter,

Për shkak të këtij ndryshimi, Kancelaria Federale ka publikuar sot fotografinë e re, të aktualizuar të vitit 2017, të Këshillit Federal, thuhet në një njoftim nga Këshilli Federal i Zvicrës.

Edhe kjo fotografi është realizuar mbi konceptin e njëjtë me atë të edicionit të parë të këtij viti (janar 2017), shkruan albinfo.ch. Ajo tregon shtatë anëtarët e Këshillit Federal dhe Kancelarin Federal (post administrativ) në pamje nga afër dhe si siluetë.

Autor i fotografisë është sërish Beat Mumenthaler, ai që e kishte realizuar edhe versionin e fillimit të vitit.

Fotografia e aktualizuar e Këshillit Federal është shtypur në 10.000 kopje. Nga 1 nëntori 2017 ajo është e disponueshme në lozhat e Parlamentit Federal. Po kështu kjo fotografi mund të shkarkohet dhe porositet në adresën: www.admin.ch.