Punëtorët shëndetësorë në Francë që nuk vaksinohen do ta humbin punën

Sipas presidentit francez, Macron, të gjithë punonjësit në spitale, në shtëpi të të moshuarve etj. në Francë duhet të vaksinohen më së voni deri më 15 shtator

Pas Italisë, edhe Franca dhe Greqia po futin vaksinimin e detyrueshëm të koronës për punonjësit e shëndetit dhe përkujdesjes. Të dy vendet e BE në këtë mënyrë po reagojnë ndaj përhapjes së shpejtë të variantit delta të virusit corona, siç njoftuan të hënën në mbrëmje Presidenti francez Emmanuel Macron dhe Kryeministri grek Kyriakos Mitsotakis, shkruajnë mediat ndërkombëtare.

Në të njëjtën kohë, qasja në ambientet e brendshme të restoranteve ose bareve do të bëhet më e vështirë për ata që nuk janë të imunizuar.

Sipas presidentit francez, Macron, të gjithë punonjësit në spitale, në shtëpi të të moshuarve etj. në Francë duhet të vaksinohen më së voni deri më 15 shtator, transmeton albinfo.ch. Përndryshe, sipas Ministrit të Shëndetësisë Oliver Véran, ata nuk do të kenë më të drejtë të punojnë dhe nuk do të paguhen më.

Për pjesëtarët e grupeve të rrezikut, të vaksinuar në fillim të këtij viti, do të ketë gjithashtu vaksina përforcuese me një dozë të tretë në Francë nga shtatori. Macron ka folur sot për një “garë” të re kundër virusit, e cila po përhapet përsëri në të gjithë Francën.

Pa veprim të shpejtë, ekziston rreziku i presionit të ri mbi spitalet.

Në Francë, fjalimi gjysmë orësh i presidentit Macron pati një efekt të menjëhershëm, përcjell albinfo.ch. Faqja e rezervimit Doctolib ka publikuar në Twitter se numri i termineve të vaksinimit ka pasur një ngritje të madhe, të përnjëhershme.

---