Qershori dhe korriku me temperature rekord në Evropë

Shkencëtarët thonë se moti i nxehtë mund të jetë veçanërisht i rrezikshëm kur shfaqet në verën e hershme

Meteorologët kanë paralajmësuar se në muajin qershor dhe korrik do të thyhen temperaturat në shumë vende evropiane.

Ekspertët e motit presin që rekordet e mëparshme të temperaturave të qershorit të arrihen ose të tejkalohen në Austri, Belgjikë, Çeki, Danimarkë, Francë, Luksemburg, Gjermani, Holandë dhe Zvicër, ndërsa pritet që në disa shtete të thyhen rekordet e të gjitha kohërave.

Në Francë temperaturat pritet të shkojë në 45 gradë në qytetet jugore të Miesit dhe Carpentrasit të premten, përcjell albinfo.ch.

Temperatura më e lartë në të kaluarën në Francë është regjistruar më 21 qershor të vitit 2003, kur në termometër kishte shfaqur shifra 41.5 gradë. Temperatura më e lartë e të gjitha kohërave në Francë është shënuar më 12 gusht të vitit 2003 dhe ishte 44.1 gradë, shkruan “The Guardian”.

Temperatura të larta pritet të mbizotërojnë në një pjesë të madhe të Evropës, duke u nisur nga Spanja deri në Republikën Çeke.

Shkencëtarët thonë se moti i nxehtë mund të jetë veçanërisht i rrezikshëm kur shfaqet në verën e hershme, para se njerëzit të jenë përgatitur për një gjë të tillë. Nga vala e të nxehtit e vitit 2003 në Evropë kishin vdekur rreth 70 mijë njerëz.

 

---