Qeveria e “drejton” autostradën nga Malisheva

Autostrada Vërmicë-Merdare “Dr. Ibrahim Rugova” nuk do të kalojë nga Shtimja, por nga Malisheva. Këtë vendim e ka marrë Qeveria e Kosovës në mbledhjen e djeshme.

Kryeministri Hashim Thaçi e arsyetoi këtë opsion, duke thënë se do të kursehen qindra miliona euro.

“Dikush mund të pyesë pse është ky devijim. Përgjigjja është shumë e qartë e studiuar me ekspertë vendorë dhe ndërkombëtarë. Kursehen mbi 350 milionë euro dhe do të ketë vetëm shtatë minuta shtesë në kuptimin e humbjes së kohës. Për ne si Qeveri janë shumë dhe duhet kursyer këto mjete që t’i investojmë në projekte tjera”, ka thënë Thaçi.

Edhe kësaj radhe kryeministri nuk bëri të ditur se sa do të jetë vlera e përgjithshme e projektit, por vetëm i referohet kursimit të qindra milionëve, qoftë nga Malisheva, qoftë me tunele nga Shtimja e Lipjani.

Po ashtu Qeveria ka vendosur që në funksion të punimeve të shpronësojë pronat ku pritet të ndërtohet autostrada nga Qafa e Duhlës në drejtim të Orllatit, për t’u lidhur në magjistralen Prishtinë-Pejë.

Sipas Thaçit, i gjithë projekti është duke shkuar sipas parashikimeve që ka bërë Qeveria me kompaninë turko-amerikane “Bechtel-Enka”.

“Tri seksionet e para, që përbëjnë 34 kilometra do të përmbyllen brenda një viti”, ka thënë Thaçi.