Qeveria e Kosovës ndan 102 milionë euro për pagën e 13-të dhe përvojën e punës

Projektligji për rialokimin e buxhetit parasheh mjete për pagën e 13-të të punonjësve publikë dhe pagesat retroaktive për përvojën e punës

Qeveria e Kosovës ka miratuar projektligjin për rialokimin e 102 milionë eurove në buxhetin e Kosovës, ku pjesa kryesore e mjeteve është paraparë për mbulimin e shpenzimeve në sektorin publik, transmeton albinfo.ch.

Ministri i Financave, Hekuran Murati, tha se një pjesë e mjeteve do të shkojë në kontingjencën e pagave për të mbuluar pagën e 13-të për punonjësit e sektorit publik, si dhe shtesat për përvojën e punës.

Sipas Muratit, pagesat retroaktive do të mbulojnë edhe diferencën e shtesës prej 0.5 për qind për çdo vit përvojë pune, për periudhën e kaluar.

“Që nga ky vit, me anë të Ligjit për Ndarje Buxhetore e kemi mbuluar shtesën prej 0.5 për qind, mirëpo hapësira e pambuluar që ka mbetur është prej kur ka hyrë Ligji i Pagave në fuqi deri në fund të vitit të kaluar”, deklaroi Murati në mbledhjen e Qeverisë.

Nga fondi i rialokuar janë paraparë edhe 20 milionë euro për pensionet bazike. Sipas ministrit Murati, këto mjete synojnë të mbulojnë rritjen e numrit të pensionistëve dhe kostot që rrjedhin nga kjo rritje.

Paga e 13-të për punonjësit e sektorit publik ishte ndarë edhe gjatë vitit të kaluar.

Ndërkaq, shtesa për përvojën e punës lidhet me ndryshimet e bëra përmes Ligjit për Pagat. Fillimisht, punonjësit përfitonin shtesë prej 0.5 për qind për çdo vit përvojë pune, që nënkuptonte se një punëtor me 10 vjet përvojë përfitonte 5 për qind shtesë mbi pagën bazë.

Me hyrjen në fuqi të Ligjit për Pagat në vitin 2022, kjo skemë u ndryshua. Për 15 vitet e para të përvojës, shtesa u përcaktua në 0.25 për qind për çdo vit, ndërsa pas vitit të 15-të parashihej 0.5 për qind për vit.

Kjo dispozitë më pas u shpall antikushtetuese nga Gjykata Kushtetuese, duke krijuar edhe bazën për trajtimin e diferencave të shtesës së përvojës për periudhën përkatëse./Albinfo.ch

---