Qeveria ishte në kontakt me grupin e armatosur

Sipas medieve lokale, diplomatët amerikan në Shkup posedojnë incizime telefonike, se Jankullovska dhe Mijallkov kanë qenë në kontakt me grupin e armatosur në Kumanovë

Ministrja e dorëhequr e Punëve të Brendshme, Gordana Jankullovska dhe shefi i shërbimit sekret maqedonas, Sasho Mijallkov kanë pasur kontakte telefonike me grupin e armatosur që luftoi në Kumanovë. Siç raportojnë mediet lokale, ata kanë kontaktuar me Mirsad Ndrecën i njohur si komandant Nato, për të gjetur një zgjidhje.

Kontakti i tyre me grupin e armatosur të shqiptarëve, duket se është bërë shkaku kryesor që detyroi dy njerëzit me të besuar të kryeministri Nikola Gruevski të japin dorëheqje. Dorëheqja e tyre erdhi menjëher pas një takimi që ata zhvilluan në ambasadën e Shteteve të Bashkuara të Amerikës në Shkup.

Sipas burimeve të portalit Libertas, në këtë takim, Jankullovskës dhe Mijallkovit u janë dhënë regjistrime (incizime) nga kontaktet telefonike midis përfaqësuesve të Drejtorisë së Sigurisë dhe Kundëzbulimit (DSK) me grupin e armatosur, konkretisht me personin e quajtur komandant Nato dhe njerëzit e tij, citon INA.

Siç thuhet më tej, aty u është dëshmuar përfshirja e DSK-së, e cila ka biseduar me grupin e armatosur në Kumanovë.

“Shqiptarë të punësuar në DSK kanë kontaktuar përmes telefonit me grupin e armatosur, duke thënë se ata kanë kontaktuar me urdhër direkt të shefit të DSK-së, i cili ka pyetur se çfarë kompensimi kërkojnë që të tërhiqen. Praktikisht MPB ka hyrë në bisedime me ta”, thotë burimi i Libertas.

Paralelisht me këtë, edhe lideri i BDI-së, Ali Ahmeti, në marrëveshje me partnerët e koalicionit ka kërkuar ndihmë nga OSBE për të tërhequr tre persona të afërt me të që ishin pjesë e grupit, që më pas të negocion me ta.

“Gjatë takimit të sotëm në ambasadën amerikanë, edhe Ahmetit iu bë e ditur se komuniteti ndërkombëtar përmes këtyre incizimeve e ka të qartë edhe përfshirjen e Qeverisë në ngjarjet në Kumanovë dhe se aksionin e përgjakshëm MPB-ja e filloi kur veçse në terren kishin humbur jetën disa pjesëtarë të forcave policore”, bën të ditur burimi.

“Dorëheqjet që ndodhen janë logjike pas takimeve mes ambasadorëve dhe zyrtarëve”, ka thënë burimi diplomatik, duke mos e bërë të qartë nëse edhe kryeministri Nikolla Gruevski së shpejti do të japë dorëheqje, edhe pse sipas burimit, ka pasur informatat për kontaktet e kushëririt të tij me grupin kriminal.