Qeveria: MSH-ja është e përfshirë në situatën emergjente në Veri të Kosovës

Komuna e Mitrovicës së Veriut dhe ajo e Zveçanit janë futur në karantinë për shkak të rasteve pozitive që janë shfaqur me Covid-19.

Zëdhënësi i Qeverisë në detyrë, Përparim Kryeziu, ka thënë për klankosova.tv se Ministria e Shëndetësisë është plotësisht e përfshirë në situatën emergjente të shëndetit publik në Komunën Veriore të Mitrovicës dhe në Zveçan.

“Ministri në detyrë i Shëndetësisë, Vitia, është në kontakt të rregullt dhe të vazhdueshëm me kryetarët dhe autoritetet përgjegjëse në këto komuna”.

Ai deklaroi se institucionet e përfshira janë në koordinimin të plotë dhe bashkëpunim të ngushtë me qëllim të tejkalimit sa më parë dhe sa me lehtë të pandemisë së koronavirusit.

“Ky virus nuk njeh as racë, as etni, prandaj edhe trajtimi i tij nuk duhet të bëhet me ato baza”.

“Qeveria mbetet e përkushtuar në zbatimin e të gjitha masave të vendosura pas situatës se krijuar me COVID 19, të cilat kanë për qëllim të parë dhe të vetëm ruajtjen e shëndetit e qytetarëve të Republikës së Kosovës, pa dallim”, theksoi Kryeziu, përcjell Albinfo.ch.