Qeveria nuk e di sa do të paguaj “Bechtel-Enka-n”

Sipas planit buxhetor, në bazë të tabelave të sivjetme buxhetore në autostradë parashihet të shpenzohen 225 milionë euro

Qeveria e Kosovës nuk e di vlerën e saktë të faturës që obligohet t’i paguajë kompanisë ndërtuese të autostradës Morin-Merdar, konsorciumit “Bechtel-Enka”, për pjesën e mbetur të punimeve në tri segmentet e para.

Në raportin e fundit për shpenzimet dhe të hyrat financiare është raportuar se për fazën ndërtuese dhe aspektin e shpronësimeve në autostradën “Ibrahim Rugova” që nga fillimi i vitit janë shpenzuar rreth 190 milionë euro.

Vetë planifikuesit e shpenzimeve financiare të shtetit, ndonëse parashikojnë se janë brenda planit vjetor të shpenzimeve, nuk e dinë vlerën e përafërt të faturës që do ta sjellë në fund të punimeve të sivjetme ndërtuesi “Bechtel-Enka”, shkruan Koha Ditore.

Në Ministrinë e Financave, përgjegjëse për caktimin dhe ndarjen e mjeteve financiare sipas planit buxhetor, kanë thënë se në bazë të tabelave të sivjetme buxhetore në autostradë parashihet të shpenzohen 225 milionë euro.

Zyrtarë të kësaj ministrie nuk e dinë nëse kjo vlerë financiare do t’i mbulojë shpenzimet e gjithëmbarshme të bëra sivjet në projektin e “Rrugës 7”.

“Për këtë vit janë ndarë 225 milionë euro për autostradën Vermicë-Merdar, ndërsa deri në fund të shtatorit janë shpenzuar 170.3 milionë euro për punët e kryera, si dhe 19.2 milionë euro janë shpenzuar për shpronësim”, ka thënë Muharrem Shahini, zëdhënës i Ministrisë së Financave.

Kjo ka qenë përgjigjja e kësaj ministrie në kërkesën e gazetës rreth qëndrueshmërisë së mjeteve dhe kostos totale për muajin tetor dhe eventualisht për nëntorin në ndërtimin e autostradës Morin-Merdar.