Qeveria nuk ka marrë ftesë nga Vatikani

Në fakt, nuk ka pasur Qeveria dhe kryeministri Thaçi kurrfarë thirrje, pasi Vatikani nuk dërgon ftesa, as shteteve më të mëdha të botës

Qeveria e Kosovës është zënë pisk pas deklaratës se është ftuar të marrë pjesë në ceremoninë e lumturimit të Papës Gjon Pali II, që u mbajt dje në Romë.

Në njoftimin zyrtar që u dërgua në Zyra e kryeministrit Hashim Thaçi, thuhej se me ftesën zyrtare të shtetit të Vatikanit, kryeministri Thaçi merr pjesë në këtë ceremoni.

Por, në fakt, nuk ka pasur Qeveria dhe kryeministri Thaçi kurrfarë thirrje, pasi Vatikani nuk dërgon ftesa, as shteteve më të mëdha të botës.

Në një deklaratë për gazetën Zëri, shefi i programit shqip të Radio Vatikanit, Dom Davidi, nuk mund të besonte se Qeveria e Kosovës mund të ketë bërë një njoftim të tillë, duke shprehur bindjen se janë mediat ato që e kanë transmetuar gabimisht lajmin.

“Nuk ka pasur ftesë për Kosovën e askënd tjetër, në raste të tilla janë përfaqësuesit e qeverive ato që paralajmërojnë vetë me dëshirë pjesëmarrjen”, ka thënë Davidi.