Quinti: Nuk ka kthim prapa situatës së 25 korrikut

SHBA-ja, Britania e Madhe, Gjermania, Franca dhe Italia i kanë dërguar një demarsh Serbisë, në të cilën i është bërë e ditur se nuk ka kthim prapa situatës së 25 korrikut.

Mediat serbe, citojnë burime të afërta me qeverinë në Beograd që e ka pranuar demarshin. Në të fuqitë perëndimore propozojnë një formulë të re të kontrollimit të kufijve, të tillë që raportohet se e ka propozuar Robert Cooper.

“Deri më tash në kalimet administrative ka pasur serbë dhe joshqiptarë që janë ndihmuar nga EULEX-i. Sipas modelit të ri në të ardhmen aty do të jenë tre serbë, tre shqiptarë dhe dy policë të EULEX-it. Është kërkuar me ultimatum që Serbia të ndalojë kontrollin e veriut të Kosovës nëpërmjet strukturave paralele”, ka thënë burimi për Alo, duke iu referuar demarshit.

Ajithashtu agjencia gjermane e lajmeve, DPA, raportoi se Robert Cooper propozoi kontrollin e kufijve nga policë e doganierë shqiptarë e serbë, dhe tha se mund të hyjnë vetura, por jo kamionë me mallra.