Qyteti i Bernës jep Çmimin për Integrim

Data e fundit për paraqitje është 2 marsi 2012 ndërsa çmimi do të dorëzohet me një solemnitet, në qershor të këtij viti

Drejtoria për arsim, çështje sociale dhe sport e qytetit të Bernës do të ndajë edhe këtë vit, për të nëntën herë çmimin për integrim. Me këtë rast, me çmimin kryesor dhe një çmim stimulues do të vlerësohen përpjekjet e veçanta në fushë të integrimit të popullatës me prejardhje të huaj, në këtë qytet.

Të gjitha shoqatat, firmat, organizatat jopërfituese, personat privatë dhe të angazhuarit tjerë mund të paraqiten menjëherë ose të paraqesin ata që konsiderojnë se e meritojnë një çmim të tillë.

Data e fundit për paraqitje është 2 marsi 2012. Ndërkaq, çmimi do të dorëzohet me një solemnitet, në qershor të këtij viti.

Çmimi, përveç si mirënjohje ka edhe vlerën e tij monetare. Fituesi kryesor merr një shumë prej 5000 frangash ndërsa fituesi i çmimit stimulues, 2000 franga.