Radiotelevizioni italian me programin e parë në arbërishte

Kalabria nis program të ri RAI në gjuhën arbëreshe

Kalabria bëhet rajoni i parë italian me statut të zakonshëm që nis një program të RAI-t të dedikuar pakicave gjuhësore, duke përfshirë programe televizive dhe radiofonike tërësisht në gjuhën arbëreshe, transmeton albinfo.ch.

Pas nënshkrimit të marrëveshjes midis presidencës së Këshillit të Ministrave dhe RAI-t, prodhimi i këtyre programeve ka filluar, me qëllim promovimin e kulturës arbëreshe dhe mbrojtjen e trashëgimisë së saj, sipas Ligjit 482 të vitit 1999 dhe Kontratës së Shërbimit Kombëtar.

“Programimi fillon në mesin e shtatorit dhe do të zgjasë 13 muaj. Jemi rajoni i parë që prodhon program në një gjuhë minoritare, dhe kjo më bën krenar si kalabrez,” tha Massimo Fedele, drejtor i zyrës rajonale të RAI Calabria.

Anila Bitri Lani, ambasadorja e Shqipërisë në Itali, e ka cilësuar këtë hap si të rëndësishëm për komunitetin arbëresh dhe shoqërinë italiane, duke theksuar se programi ruan dhe vlerëson trashëgiminë gjuhësore dhe identitare, duke lidhur brezat e rinj me kujtimin e paraardhësve.

Programi televiziv do të transmetohet nga 21 shtatori, me një episod çdo të diel, ndërsa programi radiofonik do të jetë aktiv nga e hëna deri të premten, me përsëritje në fundjavë, duke eksploruar të gjitha aspektet e kulturës arbëreshe. /Albinfo.ch

---