Rama me lajm të mirë për shqiptarët e Amerikës, së shpejti linja direkte Nju-Jork-Tiranë

Keystone (AP Photo/Visar Kryeziu)

Kryeministri i Shqipërisë, Edi Rama, ka dhënë një lajm të mirë për shqiptarët e Amerikës, gjatë takimit që ai zhvilloi me një përfaqësi të tyre në Gotham Hall të Nju-Jorkut.

Ai njoftoi se kanë nisur diskutimet me kompaninë amerikane Delta për vendosjen e një linje ajrore direkte me Tiranën.

“Shqipëria ka aeroportin me rritjen më të madhe në Evropë dhe aktualisht po negocion me kompaninë Delta për një fluturim direkt nga SHBA në Shqipëri. Nuk e di se kur përfundon negociata. Ndërkohë do të hapim dhe aeroportin e Vlorës, i cili do të ketë pistën më të gjatë në rajon dhe është bërë e tillë për fluturimet transoqeanike dhe po bisedojmë me AirAlbania për një fluturim të drejtpërdrejtë dhe do ta bëjmë këtu në Nju-Jork. Por e sigurt është që koha e gjatë për të pasur një fluturim të drejtpërdrejtë nuk do të jetë më aq e gjatë dhe besoj se për një kohë të arsyeshme do ta sjellim avionin këtu”, tha Rama.