Rama tërheq premtimin: Nuk mund t`i dhurojmë vaksina Kosovës

Sonte në orët e mbrëmjes në aeroportin ndërkombëtar “Nënë Tereza” në Shqipëri mbërritën 1170 dozat e para nga kompania Pfizer, sipas kontratës së nënshkruar me qeverinë

Kryeministri i Shqipërisë Edi Rama është tërhequr nga premtimi i tij për t’i dhuruar Kosovës disa doza të vaksinës anti-Covid, raporton Albinfo.ch.

Ai ka bërë të ditur se nuk do të mund të dhurojë vaksina, gjersa ka ftuar 50 persona nga personeli mjekësor i Kosovës për t’u vaksinuar në Shqipëri.

Ndërkohë që sonte në orët e mbrëmjes në aeroportin ndërkombëtar “Nënë Tereza” në Shqipëri mbërritën 1170 dozat e para nga kompania Pfizer, sipas kontratës së nënshkruar me qeverinë.

Kryeministri Rama deklaroi se ata që kanë marrë dozën e parë do të mund të marrin edhe dozën e dytë, ndërkohë që brenda muajit pritet të vinë edhe 41 mijë dozat e tjera nga kjo kompani.

“Më vjen shumë mirë që ne ja kemi dalë të mos mbetemi në rrethin vicioz kur për fat të keq janë shumë të tjerë. Nuk kam harruar që kemi marrë një zotim për të ndihmuar Kosovën por rregullat tejet strikte dhe kufizimet jashtëzakonisht të forta që kompania Pfizer ka vendosur, siç kanë bërë nga njëra anë që ne të mbetemi strikt për origjinën e vendit për dozat e para e bëjnë të pamudur që ne të japim doza vaksinash por nuk e bëjnë të pamundur që ne të vaksinojmë këtu një numër mjekësh nga spitalet Covid”, deklaroi Rama, shkruan tutje Albinfo.ch.

---