Rastet më të shpeshta të mohimit të të drejtave të njeriut janë ato ekonomike

Në Ditën Ndërkombëtare për të Drejtat e Njeriut, u kërkua që askujt të mos u mohohen të drejtat të siguruara me Kushtetutë dhe Ligje të Kosovës.

Për shënimin e kësaj dite, Avokati i Popullit, Hilmi Jashari, së bashku me përfaqësues të OJQ-ve, kanë marshuar nga Teatri Kombëtar me moton “Çohu për të drejtat e njeriut”, përcjell albinfo.ch.

“Jemi një numër i madh i organizatave që jemi aktive dhe e kemi nën ombrellë mbrojtjen e të drejtave të njeriut, ndaj në një deklaratë të përbashkët që e kemi nënshkruar me avokatin e popullit Hilmi Jashari, jemi zotuar se do të jemi parimorë në këtë drejtim dhe do të mundohemi që askujt të mos i mohohet asnjë e drejtë”, ka deklaruar Luljeta Demolli, përfaqësuese e Organizatave Joqeveritare për të Drejtat e Njeriut.

Ndërkaq, Avokati i Popullit, Hilmi Jashari tha se kjo është ditë e veçantë pasi iu bëhet referencë vlerave universale të të drejtave të njeriut.

“Të gjitha kategoritë ku u mohohen të drejtat elementare duhet të trajtohen njësoj. Rastet më të shpeshta të mohimit të të drejtave të njeriut janë rastet ekonomike. Shpresojmë që shumë shpejt Qeveria e Kosovës të trajtojë rastet që ne i kemi dërguar”, ka thënë Jashari.