Remitencat në Kosovë vijnë kryesisht nga Gjermania dhe Zvicra

Nga Gjermania dhe Zvicra dërgohen 36.3, përkatësisht 22.1 për qind të remitencave të pranuara në Kosovë.

Sipas të dhënave të fundit të Bankës Qendrore të Republikës së Kosovës, deri në muajin shtator të 2015-ës vlera e tyre ka arritur në 566 milionë euro apo 12 për qind më shumë se vitin e kaluar.

Kosova konsiderohet si një ndër shtetet me më së shumti dërgesa të migrantëve.

Janë mbi 22 për qind e familjeve që pranojnë para nga të afërmit e tyre, e që në shumicën e rasteve shfrytëzohen për konsum ditor.

Sipas shifrave zyrtare, remitencat që pranohen në Kosovë vijnë kryesisht nga Gjermania dhe Zvicra, vende këto nga të cilat dërgohen 36.3 përkatësisht 22.1 për qind të gjithsej remitencave të pranuara në Kosovë, raportojnë mediat në Prishtinë, përcjell albinfo.ch.

Në raportin e fundit të Bankës Qendrore të Republikës së Kosovës, ndër të tjera thuhet se përveç familjeve, edhe aktiviteti ekonomik në nëntë muajt e parë të vitit 2015 është mbështetur nga dy burime të rëndësishme të rritjes ekonomike në vend, remitencave dhe investimeve të huaja.