Rënie rekorde e numrit të azilkërkuesve, Zvicra mbyll dy qendra azili

Deri në fund të vitit numri i kërkesave të azilit pritet të jetë 14.500, që është numri më i vogël që nga viti 2007

Autoritetet federale të vendit kanë mbyllur përkohësisht dy qendra azili të nivelit federal, në Kappelen (Bernë) dhe Muttenz (Baselland). Qëllimi i mbylljes së tyre është ulja e shpenzimeve për 30 milionë franga në vit, njofton Sekretariati Shtetëror përm Migracion (SEM) shkruan srf.ch.

Numri i të huajve që kërkojnë azil në Zvicër ka disa vite që po shënon rënie të vazhdueshme. SEM llogarit që deri në fund të vitit numri i kërkesave të azilit do të jetë gjithsej 14.500, që është numri më i vogël që nga viti 2007, transmeton albinfo.ch

Mbyllja e dy qendrave të pëmendura quhet e përkohëshme pasi që është vendosur që, në rast se do të ketë ndërkohë sërish rritje të numrit të azilkërkuesve, ato do të rihapen dhe do të fillojnë punën brenda katër deri 12 javëve.

Më tutje SEM ka njoftuar se ka për synim përmirësimin e dinamikës së kthimit të azilkërkuesve në vendet e tyre në mënyrë që mundësisht sa më shumë azilkërkues të kthehen në mënyrë vullnetare.

Në konferencën nacionale të azilit, të mbajtur në vitin 2014, federata dhe kantonet qenë marrë vesh që t`i sigurojnë 5000 vende për strehim të azilkërkuesve në qendrat federale. Kjo do të bëhej me qëllim zbatimin e procedurave të shpejtuara të azilit për ta, transmeton albinfo.ch. Ishte menduar që në gjashtë regjione të azilit, në sa ishte ndarë Zvicra, të përpunoheshin  deri në 29.000 kërkesa azili në vit.

Aktualisht, në dispozicion janë 4.000 vende për strehim të azilkërkuesve në qendrat federale ndërkohë që vetëm gjysma e tyre janë duke u shfrytëzuar.

---