Rihyri ilegalisht në Itali, riarrestohet 42-vjeçari shqiptar

Shqiptar 42-vjeçar riarrestohet në Itali për shkelje të urdhrit të dëbimit

Një shtetas shqiptar 42 vjeç është riarrestuar nga karabinierët italianë, pasi kishte hyrë ilegalisht në Itali, duke shkelur një urdhër gjykate që i ndalonte rihyrjen në territorin italian për një periudhë pesëvjeçare, transmeton Albinfo.ch. 

Ngjarja ka ndodhur në Morolo, ku karabinierët po zhvillonin një operacion parandalues kundër mashtrimit dhe krimeve kundër pronës. Gjatë kontrollit, efektivët ndaluan një automjet të tipit “Mercedes Benz C-Class”.

Gjatë verifikimeve, në automjet u identifikua 42-vjeçari shqiptar, i cili me të vënë re praninë e forcave të rendit u shfaq i dyshimtë dhe tentoi të largohej fshehurazi. Karabinierët ndërhynë menjëherë, e urdhëruan të ndalonte dhe e neutralizuan në vend.

I dyshuari u shoqërua në kazermat e Anagni-t për identifikim dhe verifikim të statusit të tij ligjor. Hetimet e mëtejshme konfirmuan se ai ishte subjekt i një urdhri dëbimi pesëvjeçar, me ndalim të rreptë rihyrjeje në Itali.

Pas konstatimit të shkeljes së këtij urdhri, autoritetet italiane e vendosën 42-vjeçarin në arrest shtëpiak, ndërsa priten veprimet e mëtejme procedurale nga organet e drejtësisë./Albinfo.ch 

---