Rikthehet Festivali i filmit në Selanik, pas 2 vjetësh

U deshën plot dy vjet që Festivali Ndërkombëtar i Filmit në Selanik të rikthehej në sallat e kinemave. Edicioni i 62-të mirëpret mbi 200 filma, kryevepra, homazhe dhe për herë të parë tri kategori për konkurrim.

Regjisori francez, Samuel Theis, në pjesëmarrjen e tij të dytë prezanton një vepër mbresëlënëse mbi historinë e një djali 10-vjeçar dhe familjes së tij, i cili bie në sy nga fëmijët e tjerë në lagjen e varfër në lindje të Francës. Gjërat ndryshojnë për të kur në qytet vjen një mësues i ri, i cili hap horizonte të reja për djaloshin.

Premiera botërore e filmit u shfaq në La Semain në Kanë, ndërsa në kinematë franceze do të shfaqet në pranverë të vitit të ardhshëm.

“Është një film që përshkruan kalimin e moshës, një portret i moshës së tij. Kur je 10 vjeç, besoj se është një moshë shumë interesante për kinemanë, pasi nuk je ende në adoleshencë. Por, prapë ka gjëra që ndodhin në kokën tënde. Është mosha e ndërgjegjësimit. Filmi flet për këtë djalë, i cili ndërgjegjësohet për shoqërinë që e rrethon dhe dëshirën e tij për t’u arratisur”, tha regjisori Samuel Theis.

Filmi i regjisorit hungarez Gabor Fabricius është një dramë që zhvillohet në vitin 1983, pas perdes së hekurt të regjimit komunist në Budapest. Frenk është një këngëtar karizmatik i një grupi punk, që mbart zërin e një brezi kundër një regjimi totalitar. I kapur me forcë nga policia dhe i bllokuar në një spital psikiatrik, Frenk do të sakrifikoje gjithçka për të rezistuar.

Premiera e filmit u shfaq në Venecia, dy muaj më parë dhe tashmë është duke u transmetuar në të gjitha kinematë e Hungarisë

“Filmi ka të bëjë me qasjen e tij punk dhe qasjen e tij muzikore. Flet për lirinë dhe të drejtën e fjalës. Ka të bëjë me të drejtën për të menduar. Kur ky personalitet i fortë bie ndesh me një regjim totalitar, atëherë kemi një dramë të vërtetë. Pra, çështja nëse ai do të bëhet të heshtë apo jo, është simbolika e këtij filmi. Kjo dilemë është çfarë e tërheq dhe audiencën”, tha regjisori Gabor Fabricius.

Synimi i organizatorëve të këtij festivali është rikthimi i publikut në sallat e kinemave. Por, mbi të gjitha, që ata të ndihen të sigurt dhe të mbrojtur, pavarësisht COVID-19. Ata e fituan këtë bast: kryeveprat kanë mbërritur dhe të gjitha biletat thuajse janë shitur./Euronews