Reduktimet e energjisë elektrike në Kosovë, të nisura sot në mëngjes, janë ndalur në orën 14.00. Kështu ka njoftuar Ministria e Ekonomisë, e cila ka bërë të ditur se është rikthyer furnizimi i rregullt me energji elektrike.
Kjo është arritur falë bashkëpunimit mes Kosovës dhe Shqipërisë, përkatësisht Korporatës Energjetike të Kosovës (KEK) dhe Korporatës Elektroenergjitike të Shqipërisë (KESH).
Në komunikatën e kësaj ministrie thuhet se duke u nisur nga situata botërore me krizën energjetike që ka prekur edhe rajonin, të gjitha institucionet përgjegjëse po punojnë intensivit dhe në koordinim për sigurinë e furnizimit me energji elektrike.
“Institucionet do të vazhdojnë të bëjnë përpjekjet maksimale për të ruajtur furnizimin e rregullt me energji elektrike gjatë ditëve në vijim”, thuhet në njoftim.
Ministria e Ekonomisë u ka bërë thirrje të gjithë qytetarëve dhe bizneseve që të marrin masa kursimi dhe të jenë sa më të kujdesshëm në përdorimin e energjisë elektrike.
“Bashkëpunimi me Shqipërinë do të pasohet nga të tjera masa në adresim të krizës energjetike dhe gjendjes së emergjencës ku ndodhemi”, thuhet në komunikatë./Albinfo.ch