Rinënshkruhet marrëveshja për përzgjedhjen e bordeve të ndërmarrjeve publike

Haradinaj ka pranuar se situata nuk është aspak e mirë në një numër ndërmarrjesh publike e agjenci dhe se një gjë e tillë duhet të ndryshojë

Kryeministri i Kosovës, Ramush Haradinaj dhe ambasadori britanik, Ruari O’Conell, kanë nënshkruar marrëveshjen e mirëkuptimit për përzgjedhjen e bordeve të ndërmarrjeve publike. Kryeministri Haradinaj ka pranuar se situata nuk është aspak e mirë në një numër ndërmarrjesh publike e agjenci dhe se një gjë e tillë duhet të ndryshojë.

Ai ka përmendur nevojën për të ulur numrin e agjencive sipas kërkesave të bëra nga instancat ndërkombëtare, duke shprehur gatishmërinë për miratimin sa më të shpejtë të ligjit për qeverinë, përmes të cilit do të ulej edhe numri i ministrive që, sipas tij, edhe aty janë shumë.

Nga ana tjetër, ambasadori O’Conell ka bërë të ditur se nga marrëveshja e parë kanë përfunduar vetëm dy përzgjedhje, ndërsa shumë të tjera kishin mbetur për shkak të mungesës së qeverisë, ndërsa ka shprehur shqetësimin për numrin e vogël të femrave pjesëmarrëse në proceset e konkurrimit. Marrëveshja, për të cilën nuk kanë dhënë detaje nëse është e njëjtë me parapraken, kanë thënë se është e vlefshme për një vit me mundësi vazhdimi.