Robert Lulgjuraj, shqiptari që synon një vend në Kongresin Amerikan

Prokurori me origjinë shqiptare shpall kandidaturën për Distriktin e 10-të në Michigan në zgjedhjet e vitit 2026

Prokurori me origjinë shqiptare Robert Lulgjuraj ka shpallur zyrtarisht kandidaturën e tij për një ulëse në Kongresin e Shteteve të Bashkuara, duke synuar përfaqësimin e Distriktit të 10-të në Michigan në zgjedhjet e vitit 2026, transmeton albinfo.ch.

I angazhuar me Partinë Republikane, Lulgjuraj synon të bëhet një nga zërat e rinj në politikën amerikane me një histori personale të lidhur ngushtë me emigracionin shqiptar dhe integrimin në SHBA.

Familja e tij ka origjinë shqiptare nga Mali i Zi dhe ka emigruar në Shtetet e Bashkuara në vitet ’60, duke u larguar nga regjimi komunist dhe persekutimi fetar i asaj kohe.

Në karrierën e tij profesionale, Lulgjuraj ka shërbyer si prokuror në Wayne County dhe Macomb County, ku ka trajtuar mbi 2,000 çështje penale, përfshirë raste të krimit të organizuar dhe dhunës së rëndë, duke ndërtuar një profil të fortë në sistemin e drejtësisë amerikane.

“Ka ardhur koha që një shqiptar të jetë pjesë e Kongresit Amerikan,” është shprehur ai, duke theksuar motivimin e tij për t’i shërbyer komunitetit dhe për të sjellë një perspektivë të re në politikën amerikane.

Kandidatura e tij shihet si një moment simbolik për komunitetin shqiptaro-amerikan dhe një hap i rëndësishëm në përfaqësimin e diasporës shqiptare në nivele të larta të politikës amerikane./Albinfo.ch

 

 

---