“Roche” zvicerane, kompania me fitimin më të madh në Evropë: 12.9 miliardë!

Në mesin e 100 kompanive të para evropiane janë gjithsej 8 nga Zvicra. Më afër kreut, gjegjësisht në vendin e tretë është kompania e madhe në degën e industrisë ushqimore, “Nestle”

Me 12.9 miliardë dollarë fitim të realizuar gjatë vitit 2016, gjiganti zviceran i industrisë farmaceutike, “Roche” nga Bazeli zë vendin e parë në mesin e të gjitha kompanive evropiane të të gjitha degëve ekonomike, shkruan sda.ch. Në ranglistën e 100 kompanive që kanë korrur rezultatet më të mira gjatë vitit që shkoi, hyjnë tetë kompani zvicerane.

Më afër kreut, gjegjësisht në vendin e tretë është kompania e madhe në degën e industrisë ushqimore, “Nestle”, transmeton albinfo.ch. Më tutje, “Novartis” nga Bazeli, që është kompani rivale në nivel lokal dhe botëror me atë “Roche” është në vendin e 12-të. Të tjerat vijnë në pjesën e poshtme të listës: LafarfeHolcim (62), Richemont (88), Swisscom (96) dhe Syngenta (98).

Studimin nga i cili del kjo ranglistë e ka përpiluar ndërmarrja këshillëdhënëse EY.

Në nivel botëror pasqyra duket ndryshe. Atje vendin e parë, të pakontestuar e mban  “Apple”, me 60 miliardë fitim, ose e vetme, sa 5 kompanitë e para evropiane, të marra së bashku.

E gjithë kjo ishte sa i përket fitimit të pastër, ndërsa radhitja ndryshon kur për kriter merret qarkullimi vjetor., përcjell albinfo.ch Në listën e realizuar në bazë të këtij kriter, “Roche” është vetëm në vendin 32 gjegjësisht e treta ndër kompanitë zvicerane. Ndërsa më së miri nga kompanitë zvicerane kalon Glencore, në vendin e pestë, Nestle (9). Pas Roche-së vjen Novartis në vendin e 34, ABB (60)  etj.