Rritet çmimi i naftës

Pasi Arabia Saudite dhe Rusia refuzuan thirrjet e presidentit amerikan, Donald Trump, për të rritur prodhimin, nafta ka pësuar rritjen e saj më të lartë në 4 vjetët e fundit, duke u shitur me mbi 81 dollarë për fuçi.

Sot është regjistruar çmimi më i lartë prej nëntorit të vitit 2014 prej 81.16 dollarë për fuçi, që shënon gjithashtu edhe një rritje prej 3 për qind brenda ditës, përcjell albinfo.ch.

Arabia Saudite është udhëheqëse e kartelit të vendeve prodhuese të naftës “OPEC”, ndërsa Rusia është grupi më i madh prodhues i naftës jashtë këtij karteli.

Vendet e “OPEC”-ut u mblodhën në Algjer gjatë së dielës për të diskutuar nivelet globale të furnizimit dhe sanksionet amerikane ndaj Iranit, takim ky që përfundoi pa marrëveshje formale.

Ministri saudit për Energjinë, Khalid al-Falih, tha gjatë një konference për shtyp se ai nuk mundet të “ndikojë” në çmimin e naftës.