Rritet deficiti tregtar i Kosovës

Në qershor ka vazhduar të rritet deficiti tregtar i Kosovës. Ai ishte 182 milionë euro, krahasuar me 158.3 milionë euro sa ka qenë para një viti. 

Shqetësues është fakti se, sipas Entit të Statistikave të Kosovës, gjatë këtij muaji janë eksportuar mallra në vlerë prej 30.7 milionë euro, apo 0.4 për qind më pak. Ndërkohë importi është rritur 12.5 për qind, përkatësisht ai kishte arritur vlerën 212.8 milionë euro.

Kosova sërish ka vazhduar që kryesisht të eksportoj mbeturina të metaleve, 47.9 për qind, produkte minerale 30.8 për qind, ushqime të përgatitura, pije dhe duhan 3.9 për qind, plastikë, gomë dhe artikuj prej tyre, 3.7 për qind, makineri, 3.1 për qind.

Ndërkaq, pjesëmarrje më të madhe në import kanë produktet minerale, ku bëjnë pjesë edhe karburantet,19.2 për qind, ushqimet, pijet dhe duhani, 12.3 për qind, makineritë, 10.0 për qind, metalet bazë,9.4 për qind produktet e industrisë kimike, 7.5 për qind, plastikë dhe gomë, 6.5 për qind.

Partner kryesor për eksport Kosova në qershor e kishte Italinë, ku shkuan 20.9 për qind të mallrave, pastaj Kinën, 12.4 për qind, Shqipërinë, 10.4 për qind, Maqedoninë, 9.5 për qind, Zvicrën, 9.2 për qind, Gjermaninë, 5.0 për qind.

Importi më i madh u bë nga Maqedonia, 15.3 për qind, Serbia, 13.6 për qind, Gjermania, 11.3 për qind, Turqia, 7.6 për qind, Kina, 7.2 për qind.

Bashkimi Evropian me në eksportin kosovar merr pjesë 36.2 për qind, kurse në import 33.1 për qind.

Pjesëmarrja e eksportit të Kosovës në Serbi u ngrit në 1.5 për qind, nga 0.7 për qind sa ishte para një viti, ndërsa importi merrte pjesë 13.6 për qind, ose  2.2 pikë të përqindjes më shumë se në qershor të vitit 2010.  

Në maj deficiti tregtar i Kosovës ishte 183.5 milionë euro, kurse në prill, 166.5 milionë euro.