Rritet papunësia, pësojnë të huajt

Në fund të nëntorit janë regjistruar 121 109 persona që kanë mbetur të papunë, 5931 më shumë se muajin e kaluar

Ka shënuar rritje numri i të papunëve gjatë muajit nëntor në Zvicër. Në fund të nëntorit janë regjistruar 121 109 persona që kanë mbetur të papunë, 5931 më shumë se muajin e kaluar.

Në nivel vendi, kuota e të papunëve është rritur nga 2.9 në 3.1 për qind. Përqindja më e lartë ishte regjistruar së fundi gjatë muajit prill. Më shumë janë të prekur punëtorët në ndërtimtari dhe hoteleri, sidomos të huajt.

„Zhvillimet flasin në përputhje me pritjet tona“, ka thënë Serge Gaillard, shefi i Drejtorisë së Sekretariati për Çështjet Ekonomike (SECO). Dukshëm mbi mesetaren, rritje më shumë është shënuar te të huajt.

Kuota e të papunëve në mesin e të huajve ka shënuar rritje prej 5.7 deri në 6.2 për qind. 45 për qind e të gjithë të papunëve janë të huaj. Vetëm një e katërta e rritjes së papunësisë është për shkak të ngadalësimit ekonomik.

Më shumë se gjysma e të papunëve vijnë nga sektori i ndërtimtarisë dhe hotelerisë . Shifrat e papunësisë sezonale mbeten në nivelin e gjashtë muajve të fundit me 3.0 për qind.
 Rezulatet e fundit të SECO-s flasin për më pak të papunë në mesin e të rinjve. Në fund të nëntorit ishin regjistruar 18 085 persona, të gjithë të moshës 15 deri 24 vjece.