Rritet papunësia tek të diplomuarit me master në Zvicër

Që nga viti 2010 numri i të papunëve me diplomë master është rritur rreth 70 për qind, ndërsa tregu i punës nuk po arrin të përthithë numrin në rritje të të diplomuarve.

Kalimi nga universiteti në tregun e punës po bëhet gjithnjë e më i vështirë për të diplomuarit me master në Zvicër. Sipas të dhënave të fundit, që nga viti 2010 papunësia në këtë kategori është rritur me rreth 70 për qind, përcjell albinfo.ch.

Arsyeja kryesore lidhet me faktin se gjithnjë e më shumë persona po përfundojnë studimet në nivel universitar, ndërsa tregu i punës nuk po arrin ta përthithë këtë numër në të njëjtin ritëm. Ndërkohë, tek personat që kanë ndjekur një profesion përmes shkollimit profesional, situata është e kundërt: papunësia në këtë grup ka rënë me rreth 45 për qind gjatë të njëjtës periudhë.

Sipas ekonomistit Michael Siegenthaler, drejtues i kërkimeve në institutin KOF të ETH Zürich, ndikim ka edhe zhvillimi teknologjik. Ai thekson se disa profesione që përfituan nga digjitalizimi tani po preken nga rritja e efikasitetit për shkak të inteligjencës artificiale gjeneruese.

Megjithatë, arsimi vazhdon të mbetet një mbrojtje ndaj papunësisë. Të dhënat e Zyrës Federale të Statistikave tregojnë se në shkurt 2026 shkalla e papunësisë për personat me arsim të lartë ishte rreth 2.4 për qind, më e ulët se tek personat me arsim të mesëm (3 për qind) dhe shumë më e ulët se tek ata me arsim bazë (6 për qind). /Albinfo.ch

---