Rritje të infektimeve në Evropën Qendrore

(KEYSTONE/Jean-Christophe Bott)

Evropa është rajoni i vetëm që javën e shkuar ka regjistruar rritje të rasteve me COVID-19. OBSH bën me dije se një rritje prej 7% është vënë re veçanërisht në Evropën Qendrore ku edhe nivelet e vaksinimit janë të ulëta.

Në Poloni, ministri i Shëndetësisë ka paralajmëruar se vendi po përballet me një përhapje të shpejtë të rasteve me koronavirus çka mund të sjellë ndërmarrjen e masave drastike.

Për herë të parë që nga muaji maji në vend është raportuar për më shumë se 5.000 infeksione të reja ditore. Rusia raporton për 1000 viktima në ditë. Ndërsa në Mbretërinë e Bashkuar miliona njerëzve u është kërkuar të marrin dozat e treta, pasi sipas paralajmërimeve rastet e reja të covid në këtë dimër mund të arrijnë në 100. 000 raste të ditë.

“Ne nuk mund të ndihemi të kënaqur kur COVID-19 mbetet një kërcënim kaq i fuqishëm. Që kur programi ynë fenomenal i vaksinave filloi dimrin e kaluar, ne kemi qenë në një garë, një garë midis vaksinës dhe virusit. Megjithëse jemi përpara në këtë garë, hendeku po ngushtohet. Ne kemi arritur deri këtu, falë përpjekjeve të shumë njerëzve, por kur jemi përpara dimrit nuk mund të rrezikojmë”, u shpreh Sajid Javid, Sekretar i Shëndetësisë në Britani të Madhe.

Mbretëria e Bashkuar deri më tani po i reziston rivendosjes së kufizimeve, por në të tjera shtete realiteti ndryshon.