Rrugët e ‘përgjakshme’ të Kosovës

Në muajin janar e deri më 20 shkurt sipas Policisë së Kosovës në mesin e shumë aksidenteve ndodhen edhe tetë të tilla me pasojë vdekjen

Rrugët e Kosovës janë shndërruar në vendin ku po humbin jetën, fëmijë të rritur e të moshuar. Përkundër ndryshimeve ligjore që parashohin gjoba drastike për shoferët e pakujdesshëm jetët që po humbasin në rrugët e vendit janë të shumta.

Në muajin janar e deri më 20 shkurt sipas Policisë së Kosovës në mesin e shumë aksidenteve ndodhen edhe tetë të tilla me pasojë vdekjen, raporton televizioni publik i Kosovës.

Në mesin e këtyre rasteve është edhe ai i vajzës 11 vjeçe, Erëza Berisha nga Gjilani. Ajo ishte duke ecur kur u godit nga një veturë në lëvizje, përcjell albinfo.ch.

Policia konfirmoi rastin derisa tha se shkak i aksidentit ishte mospërshtatja e shpejtësisë nga drejtuesi i automjetit.

Rasti është dërguar në prokurori dhe të dyshuarit i është caktuar 1 muaj paraburgim.

Erëza, fëmija i vetëm në familje duhej të festonte sot ditëlindjen e 11-të.

Ndërkohë, në nivel vendi në muajin janar e shkurt kanë ndodhur tetë aksidente me pasojë vdekjen.