Rrugëtimi i Robin Krasniqit, kampion bote në WBA

(Ronny Hartmann/dpa via AP)

Dje në mbrëmje, Robin Krasniqi e fitoi titullin e kampionit të Botës në kategorinë gjysmë të mesme WBA, derisa mposhti me nokdaun Dominic Bosel në rundin e tretë, përcjell albinfo.ch.

Vlen të cekët se boksieri kosovar u lind në Junik të Kosovë më 1 prill 1987, derisa deri tani ka pasur disa tituj europianë, por edhe botërorë.

Historia e Robinit, emri i vërtetë i të cilit është Haxhi, është interesante dhe e dhimbshme.

Ai u largua nga Kosova për shkak të luftës në Kosovë, bashkë me familjen e tij. Ai do të vendosej në Munchen të Gjermanisë.

Debutimin profesional në boks Krasniqi e bëri më 20 tetor të vitit 2005, i cili debutim nuk ishte edhe aq i mirë, pasi që ai humbi ndaj Seven Haselhuhn, ku u nokautua në rundin e katër.

Në ndeshjen e tretë, të mbajtur më 5 janar 2006, Robini do të humbiste përsëri, prapë duke u nokautuar në rundin e katër nga Adrian Cerneaga.

Por, pas këtyre dy ndeshjeve Robin Krasniqi do të vazhdonte të fitonte për shtatë vjet rresht, duke fituar WBO dy herë për peshat e mesme.

Më 20 prill 2013, Krasniqi synoi titullin e botës kundër Nathan Clevery, por që humbi në rundin e dymbëdhjetë.

Mundësia e dytë për titull e Robinit ishte në vitin 2015, më 21 mars ku ai u mposht nga Jurgen Brahmer në rundin e nëntë në finale për ta humbur kështu rripin e WBA-së.

E treta e vërteta. Robin Krasniqi e fitoi titullin e botës WBA sonte kundër Dominic Bosel, duke u bërë kështu shqiptari i parë që ka rripin botëror në këtë kategori në boksin profesionist.