Rumania ankohet kundër vendimit të UEFA-s për ndeshjen me Kosovën

Keystone (AP Photo/Alexandru Dobre)

Rumania ankohet kundër vendimit të UEFA-s për ndeshjen me Kosovën.

Federata e Futbollit e Rumanisë ka njoftuar të martën se do të apelojë në Gjykatën e Arbitrazhit Sportiv (CAS) kundër vendimit të UEFA-s për ndeshjen ndaj Kosovës, të 15 nëntorit.

Ndeshja e Ligës së Kombeve, e ndërprerë në fund për shkak të thirrjeve të tifozëve, u vendos që t’i jepej 3:0 në tavolinë rumunëve. 

UEFA, edhe pse ia dha fitoren Rumanisë, e ka gjobitur për disa pika dhe ndeshjen e ardhshme si vendas Rumania është e detyruar ta luajë pa spektatorë. Federata e Futbollit e Rumanisë u dënua me 128 mijë euro dhe një ndeshje pa shikues. Federata e Futbollit e Kosovës u dënua me gjashtë mijë euro.

Ndeshjen pa shikues Rumania do ta zhvillojë  në kuadër të kualifikimeve për Kupën e Botës 2026.

Federata e Rumanisë ka kritikuar vendimet e UEFA-s.

“Kosova ka shkelur principin më të rëndësishëm të futbollit – që ndeshja duhet të vendoset në fushë. Dhe ata nuk u sanksionuan. Ndërsa ne morëm gjoba dhe sanksione që i konsiderojmë joproporcionale”, ka thënë presidenti i FRF-së, Razvan Burleanu.

FRF-ja ka thënë se tifozët rumunë janë sjellë me respekt dhe ishin të provokuar gjatë gjithë ndeshjes, duke thënë se nuk ka dëshmi që mbështet dënimet ndaj tyre. 

Federata e Futbollit e Kosovës veçse ka lajmëruar se do t’i drejtohet Arbitrazhit Sportiv në Lozanë për vendimin që ndeshja të regjistrohet me rezultat zyrtar në të mirë të Rumanisë. FFK-ja konsideron se rasti është betejë kundër racizmit dhe diskiminimit në të gjitha format e tij.