Rusia nuk e do Zvicrën si ndërmjetësuese në pajtimin me palën ukrainase

(KEYSTONE/Gaetan Bally)

Zëdhënësja Maria Zakharova është përgjigjur në faqen e internetit të Ministrisë së Jashtme ruse për propozimin e ndërmjetësimit të kreut të diplomacisë zvicerane, Ignazio Cassis, ku u shpreh se Zvicra, e cila u është bashkuar sanksioneve të njëanshme dhe të paligjshme të Perëndimit kundër Rusisë, nuk është më një shtet neutral dhe nuk mund të luajë asnjë rol ndërmjetësues në kontekstin e krizës në Ukrainë.

Para disa ditësh në Nju-Jork, përpara Këshillit të Sigurimit të OKB-së, këshilltari federal, Ignazio Cassis, propozoi një takim “në frymën e Konventave të Gjenevës”. “Zvicra është e gatshme në çdo moment t’i sjellë të gjithë rreth tryezës dhe të punojë për pajtueshmëri më të mirë me ligjin ndërkombëtar dhe në fund për paqen”, tha kreu i Departamentit Federal të Punëve të Jashtme (EDA). Zvicra nuk favorizon asnjë palë ndërluftuese ushtarakisht, por neutraliteti nuk do të thotë indiferencë, shtoi Cassis.

Theksohet se nuk është hera e parë që Rusia refuzon ofertën e Zvicrës. Një qëndrim i parë analog daton në gusht 2022.