Sa të burgosur do të votojnë në Kosovë

Si në të gjithë Kosovën, më 17 tetor procesi i votimit do të zhvillohet edhe në institucionet korrektuese të Republikës së Kosovës, ku për momentin janë 1 mijë e 637 të burgosur.

Zëdhënësi i Shërbimit Korrektues të Kosovës, Florent Gashi ka bërë të ditur se do të përkujdesen për krijimin e hapësirave dhe mbarëvajtjen e procesit në koordinim me Komisionin Qendror të Zgjedhjeve.

Siç tha ai, listat e votuesve dhe materialet do të sigurohen nga KQZ-ja, raportojnë mediat në Kosovë, përcjell albinfo.ch.

Tutje, ai bëri të ditur se aktualisht në institucionet korrektuese janë 1637 persona të burgosur, shkruan Telegrafi.

Ndryshe, Komisioni Qendror i Zgjedhjeve mundëson pjesëmarrjen në votime edhe të personave që për rrethana specifike nuk mund të shkojnë në vendvotim.

Qasja në këtë shërbim varet nga kategoria të cilës i përkasin, ndërsa votimi mundësohet përmes ekipeve mobile të cilat shkojnë në shtëpi apo institucionet përkatëse për të mundësuar votimin e personave që votojnë në këtë mënyrë. Kjo përfshinë edhe të burgosurit në burgje dhe të paraburgosurit në qendrat e paraburgimit.