Sadiku: Dua të rikthehem në nivelet më të larta

Armando Sadiku edhe zyrtarisht u rikthye te Lugano, aty ku beson se do të rikthehet sërish në formën e dikurshme.

Sulmuesi kuqezi edhe dy herë më parë ishte pjesë e kësaj skuadre, ku ishte dalluar me golat e tij.

Në një intervistë për mediat zvicerane, sulmuesi shqiptar ka treguar pse u rikthyer në Zvicër, përcjell albinfo.ch.

“Këtu i njoh të gjithë djemtë dhe është një atmosferë shumë e bukur. Nuk jam ende në 100% tim, por kemi edhe dy javë deri në ndeshjen e parë me Thunin”, theksoi Sadiku.

Ai u largua nga Levante ku kishte pak minuta dhe pësoi një lëndim të rëndë. “Është e rëndësishme të stërvitemi mirë dhe të jemi gati për takimin e parë”, shtoi tutje Sadiku.

Megjithatë, ai ka një qëllim. “Ata që më njohin, e dinë se sa ambicioz jam dhe se jap më të mirën në fushë. Dua të rikthehem në nivelet më të larta. Dy vite më parë, isha këtu tek Lugano dhe bëmë histori duke u kualifikuar në Ligën e Evropës. Besoj tek ky objektiv i klubit, sepse jemi edhe në Kupë”, deklaroi Sadiku.