Serbët ende në Barrikada

Pas arritjes së marrëveshjes së arritur ndërmjet Qeverisë së Kosovës dhe KFOR-t ende nuk është shënuar ndonjë lëvizje drejt zbatimit të saj.

Barrikadat nëpër rrugë të vendosura ditë më parë vazhdojnë të jenë pengesa për qarkullimin e lirë të automjeteve.

Marrëveshja që synon zhbllokimin e situatës së rënduar në veri të Kosovës pas 25 korrikut e prezantuar nga Qeveria e Kosovës përmban një plan 10 pikësh, që sipas kryeministrit Hashim Thaçi, ka mbështetjen e të gjitha palëve, KFOR-it, Bashkimit Evropian e SHBA-së.

Sipas tij, vendimet e Qeverisë për masa reciprociteti dhe vënien nën kontroll të pikave 1 dhe 31 do të implementohen deri në fund, ndërsa ka edhe një sërë çështjesh të tjera që përforcojnë edhe më tej sovranitetin e shtetit.

Kryeministri ka thënë se mbetet edhe shumë punë për të bërë që të vendosen gjykatat dhe të shkatërrohen strukturat paralele e kriminale në atë pjesë.

Kreu i delegacionit serb në bisedimet me Kosovën, Borisllav Stefanoviq, ka thënë se marrëveshja e arritur me KFOR-in është e mirë në rrethanat aktuale.

 “Marrëveshja është e karakterit të përkohshëm, ajo nuk është ideale, nuk është më e mira, por në çdo rast ndihmon në vendosjen e paqes dhe të stabilitetit, si dhe në ruajtjen e pozicionit që kanë serbët e Kosovës”, ka deklaruar Setfanoviq për mediat serbe.  Ai ka thënë se e k kupton shqetësimin e popullit dhe të kryetarëve të komunave në veri.

“Në këto moment kemi nxjerrë maksimumin nga negociatat. Nuk do të ishte mirë që populli të shkojë në një anë, e shteti i Serbisë në tjetrin”, ka thënë Bogdanoviq.

Sipas tij, marrëveshja në fjalë gjithashtu hap mundësinë e vazhdimit të dialogut dhe do të aplikohet së paku deri më 15 shtator.