Serbët forcojnë barrikadimin

Janë parë shumë fytyra të reja të pa para më parë në barrikadat e vendosura dhe tash të përforcuara nga serbët rrebel, të cilët nuk i janë ‘bindur’ as shefave të tyre në Beograd.

Në Kosovë kanë hyrë një numër i madh i njësive speciale të ushtrisë dhe xhandarmërisë.

Po ashtu gjatë ditës së shtunë janë parë në Zveçan një numër i madh i pjesëtarëve që kishin tatuazh akrepin e që nga banorët lokal janë quajtur ‘të ardhurit’, shkruan Koha Ditore.

Kurse kryetari i strukturave paralele i Komunës së Mitrovicës, në veri, Krstimir Pantiq, anëtar i Partisë Përparimtare Serbe të Tomisllav Nikoliqit është i vetmi kryetar që nuk e ka pranuar marrëveshjen dhe për këtë shkak, vendimi është shtyrë për të martën.

Mediat serbe  shrkuajnë se ka përplasje të madhe midis krerëve serbë. Po ashtu, bëhet e ditur se qytetarët serbë po nxirren me dhunë në barrikada,nga ana e grupeve kriminale dhe MUP-i serb.

Në raste të refuzimit të daljes në barrikada ata largohen nga puna, iu hidhet eksploziv në shtëpi e makina dhe shpallen tradhtarë.

Ndërkohë, bëhet e ditur se KFOR-i ka nisur një plan aksion, për të cilin do t’i vë në dijeni palët në javën e ardhshme.

Në Rudare dhe në Zupç, serbët kanë hedhur dru dhe zhavor, nga frika se KFOR-i mund të intervenojë.

Serbët e veriut e hedhën poshtë marrëveshjen, duke vazhduar bllokimin e rrugëve, duke u mbetur besnikë versionit të kryetarit të Zveçanit, Dragisha Milloviq. Takimi i ardhshëm i këtyre strukturave do të mbahet të martën, në orën 12:00, kur do të shqyrtohet marrëveshja.