Sërish grevë në aeroportet gjermane, anulohen qindra fluturime

“Grevat e reja janë të pashmangshme, sepse punëdhënësit pas një greve paralajmëruese javën e kaluar, nuk reaguan me një ofertë të re”, tha një përfaqësues i sindikatës «Verdi», e cila bashkon punëtorët e shërbimit publik, përcjell albinfo.ch.

Përveç aeroportit më të madh të Frankfurtit, me 470 nga 1,200 fluturime të planifikuara të anuluara sot, greva janë paralajmëruar edhe në Munih, Hanover, Hamburg, Bremen, Leipzig, Erfurt dhe Dresden.

Sindikatat e punonjësve në shërbimet e kontrollit të pasagjerëve dhe bagazheve për punonjësit e tyre kërkojnë një rritje deri në 20 euro, nga 14 euro aktuale. Punëdhënësit ofrojnë një rritje prej 6.5 për qind.

Federata e Aeroporteve Gjermane (ADV) kritikoi ashpër “shpërthimet e habitshme” të sindikatave që, sipas tyre, po abuzojnë me aeroportet për luftën e tyre me punëdhënësit.

“Verdi sillet në mënyrë të papërgjegjshme, duke e ngritur konfliktin në përmasa të paarsyeshme”, kritikon ADV, duke vënë në dukje se vetëm më shumë se 200,000 pasagjerë do të preken nga greva e së martës.

Greva e javës së kaluar goditi aeroportet në Berlin, Këln dhe Dusseldorf.