Shaqiri do të mungojë edhe në ndeshjet e tetorit

Ylli shqiptar ka komentuar mungesën e tij për muajin shtator dhe ka folur për të ardhmen

Muajin e kaluar, Xherdan Shaqiri nuk pranoi të grumbullohet te Zvicra me arsyetimin se dëshiron të përqendrohet te Liverpooli.

Mediat zvicerane kanë raportuar se ai nuk ka marrëdhënie të mira me Vladimir Petkoviq, derisa e dëshiron shiritin e kapitenit, që tani e mban Granit Xhaka, përcjell albinfo.ch.

Por, së fundi u raportua se Shaqiri ka pranuar të luajë në ndeshjet e muajit tetor.

“Nuk u ndjeva i aftë ta ndihmoja Kombëtaren në muajin shtator. Në konsultim me drejtuesit e Kombëtares hoqa dorë nga ftesa për t’u përqendruar tek klubi. Doja të kthehesha në nivelin maksimal për të mundur t’i ndihmoj shokët e Kombëtares. Më duhej pushim”, ka deklaruar Shaqiri në deklaratën e publikuar nga Federata e Zvicrës.

Por, ai do të mungojë në ndeshjet e tetorit për shkak të lëndimit.

Shaqirin e kanë takuar edhe drejtuesit e Federatës Zvicerane. Menaxheri i Zvicrës, Pierluigi Tami, ka thënë se, Shaqiri është pjesë e rëndësishme e ekipit dhe janë të lumtur që mund të mbështeten tek ai.

---