SHBA-ja sot e feston Ditën e Pavarësisë

Amerikanët festojnë 4 Korrikun, Ditën e Pavarësisë

Tashmë 4 korriku sa herë që përmendet, na vje në mendje Dita e Pavarësisë së Shteteve të Bashkuara. Është pikërisht dita e shënuar në vitin 1776, kur delegatët nga 13 kolonitë e Shteteve të Bashkuara miratuan Deklaratën e Pavarësisë, duke njoftuar shkëputjen nga Britania, përcjell albinfo.ch.

Kjo ditë është festë federale në Shtetet e Bashkuara që nga viti 1941 dhe tradicionalisht është një ditë kur amerikanët festojnë me fishekzjarre, parada, koncerte dhe piknik.

Disa studiues konstitucionalë argumentojnë se amerikanët duhet të festojnë në të vërtetë më 2 korrik – dhe jo 4 korrik – për shkak të votimit historik…por, në fakt, dita e sotme shikohet si festë nga amerikanët dhe nga shumë kombësi të tjera që jetojnë atje, sikurse janë edhe shqiptarët.

Dokumenti i Shpalljes së Pavarësisë së SHBA-së është njëri ndër dokumentet, ndoshta, politik më me rëndësi në botë, që përcaktoi fatin dhe kornizën për mbijetesën dhe rritjen e këtij vendi, por është gjithashtu edhe dokumenti i cili frymëzoi lëvizje të njëjta për pavarësi, anembanë botës.

Shpallja e Pavarësisë së Amerikës shënoi shkëputjen e kolonive nga Britania e Madhe 246 vjet më parë, por ajo ishte vetëm fillimi i vendosjes së lirisë në këtë vend, pasi në atë kohë në shumë koloni praktikohej skllavëria, gratë nuk gëzonin të gjitha të drejtat për të cilat bëhej thirrje në Shpalljen e Pavarësisë dhe fatkeqësisht indiano-amerikanët vendas u detyruan të shpërnguleshin nga toka e tyre ndërkohë që kolonët e ri kishin filluar të vendoseshin anembanë vendit.

Por prej nënshkrimit të këtij akti dramatik para më shumë se dy shekujsh, përpjekjet në Shtetet e Bashkuara të Amerikës për të siguruar barazi dhe të drejta të barabarta për të gjithë, kanë triumfuar me shumë fitore gjatë dekadave të kaluara, prapëseprapë ekziston vetëdija se mbetet shumë për t’u bërë dhe se ruajtja e këtyre të drejtave që na i ka falë Perëndia dhe natyra, kërkon vigjilencë të vazhdueshme për t’i ruajtur ato, sidomos nga intervenimet e qeverisë e cila ka për detyrë t’i mbrojë dhe jo të shkatërrojë liritë dhe të drejtat e popullit.

Dhe për çdo vit, pavarësia e SHBA-së festohet edhe në Kosovë. Për nder të kësaj dite, të premten Ambasada Amerikane në Kosovë ka organizuar një ndejë, në të cilën kanë marrë pjesë personalitete të ndryshme të Kosovës.

---