SHBA nuk dëgjon thirrjet e OBSH-së, përgatitet për dozën e tretë të vaksinës

Sipas Departamentit Amerikan të Shtetit doza e tretë do t’iu ofrohet të gjithë amerikanëve që i kanë marrë dy të parat përpara 8 muajsh.

Edhe përkundër rekomandimeve të OBSH-së për të mos nisur me dozēn e tretë, Qeveria amerikane prezantoi planin e saj për të bërë të mundur një dozë të tretë të vaksinës kundër koronavirusit për qytetarët e saj pas rritjes së rasteve të infektimeve me variantin Delta të virusit.

Të gjithë amerikanët që kanë marrë dy dozat e vaksinës do të kenë mundësi të marrin një dozë shtesë imunizuese duke filluar nga 20 shtatori, transmeton Cnn, përcjell Albinfo.ch.

Në fillim atë mund ta marrin punonjësit e shëndetësisë dhe ata të azileve që ishin ndër personat e parë që u vaksinuan në fund të vitit të kaluar.

Nga ana tjetër një reagim për dozën e tretë të vaksinës ka ardhur nga Organizata Botërore e Shëndetësisë, e cila deklaron se të dhënat aktuale tregojnë se momentalisht ajo nuk është e nevojshme.

Sipas OBSH, duhen ndihmuar vendet e varfra që të vaksinojë banorët e tyre me të dyja dozat përpara se vendet me të ardhura të larta të mendojnë për një imunizim shtesë.

 

---