SHBA, shumë e përkushtuar për gjetjen e një zgjidhjeje për targat

screenshot

Kryeministri i Kosovës, Albin Kurti, deklaroi se ambasadori amerikan në Prishtinë, Jeffrey Hovenier, është shumë i përkushtuar për gjetjen e një zgjidhjeje për çështjen e targave ilegale serbe, përcjell albinfo.ch.

Deklaratën Kurti e dha të martën gjatë një konferencë për rininë që është mbajtur në Prizren.

“Roli i tij është gjithmonë konstruktiv, pozitiv, kreativ. Ai po i bën përpjekjet maksimale, pra SHBA-ja, veçanërisht ambasadori Hovenier. Ata janë në kontakt me Brukselin. Shtetet e Bashkuara i duan edhe 48 orë që përafrimi i djeshëm të mund të shndërrohet në dakordësim sot ose nesër. Po i bëjmë përpjekjet maksimale.

Unë nuk mendoj që jemi në orët kur duhet të flasim për shtyrje të reja, duhet të flasim për intensitet maksimal, në mënyrë që brenda 48 orëve ta kemi marrëveshjen, siç e synuam në Bruksel, duke mos u kufizuar në çështjet siç është puna e targave”, theksoi ai.

Me kërkesë të Shteteve të Bashkuara, Kurti e ka shtyrë për 48 orë zbatimin e fazës së dytë të vendimit për riregjistrimin e makinave me targa ilegale serbe në RKS – Republika e Kosovës.