“Shkaku i Kosovës”: Spanja do të bojkotojë samitin mes BE-së dhe Ballkanit Perëndimor

Kryeministri spanjoll Mariano Rajoy nuk do të jetë pjesë e samitit mes BE-së dhe Ballkanit Perëndimor, të planifikuar në mes të majit, shkruan prestigjiozja spanjolle “El Pais”. Ai nuk dëshiron të jetë në të njëjtën fotografi me presidentin e Kosovës, Hashim Thaçi, përcjell albinfo.ch.

Foto e marrë nga El Pais

Rajoy është i frikësuar se një fotografi e tillë do ngjallte separatizëm te liderët katalonjas, të cilët edhe më tepër do prireshin nga pavarësia. Spanja është një nga pesë vendet e BE, që nuk kanë njohur pavarësinë e Kosovës, sëbashku me Qipron, Greqinë, Rumaninë dhe Sllovakinë.

Presidenti i Këshillit Europian, Donald Tusk, do të vizitojë Madridin të premten për të bindur Rajoy që të mbështesë rrugën europiane të Ballkanit. Kjo pasi edhe katër liderët e vendeve tjera europiane, që nuk e kanë njohur Kosovën, do të jenë pjesë e samitit. Për të bindur Spanjën, BE ka menduar që ta largojë flamurin e Kosovës nga samiti.