Shkarkohet drejtori i teatrit, Agim Sopi

Regjisori Sopi insiston se arsyet politike si dhe përplasja që ai ditë më parë pati me anëtarët e Bordit për sa i përket miratimit të repertorit për vitin 2018 janë arsyet e largimit të tij nga pozita e shefit të teatrit

Pas dy vjetësh qëndrimi në pozitën e drejtorit të përgjithshëm të Teatrit Kombëtar të Kosovës, regjisori Agim Sopi është shkarkuar të hënën paradite nga kjo detyrë nga Këshilli drejtues i teatrit.

Këshilli drejtues i Teatrit Kombëtar të Kosovës me gjashtë vota për e një abstenim ka votuar për ta shkarkuar atë. Kryetarja e Këshillit drejtues të TKK-së, Burbuqe Berisha, deklaroi se pas shqiptimit të dy vërejtjeve në adresë të Sopit, është marrë vendimi për largimin e tij nga kjo detyrë.

Ndërsa regjisori Sopi insiston se arsyet politike si dhe përplasja që ai ditë më parë pati me anëtarët e Bordit për sa i përket miratimit të repertorit për vitin 2018 janë arsyet e largimit të tij nga pozita e shefit të teatrit. Papërshtatshmëria politike dhe komentimi i punës së Bordit, sipas tij, janë të tjera arsye që atë e larguan nga pozita e drejtorit.