Shkatërrohet në Friburg një rrjet mashtrimi ku përfshiheshin dhjetëra të mitur

Keystone SDA

Policia kantonale e Friburgut ka identifikuar 77 persona të dyshuar për përfshirje në një skemë mashtrimi përmes porosive online, gati gjysma e të cilëve janë të mitur. Hetimi ka zbuluar 124 vepra penale, ndërsa dëmi i shkaktuar vlerësohet në më shumë se 100 mijë franga zvicerane.

Që nga fillimi i vitit, policia e Friburgut është përballur me një fenomen kriminal ku janë përfshirë adoleshentë dhe të rinj.

Sipas hetuesve, disa prej tyre janë rekrutuar përmes rrjeteve sociale nga persona që u premtonin fitime të shpejta dhe të lehta. Të rinjtë pranonin të merrnin pako, të tërhiqnin mallra nga dyqanet, t’i rishisnin ato ose të transferonin para në emër të personave të tjerë.

Të dhëna bankare të vjedhura

Skema kriminale bazohej në përdorimin e të dhënave bankare të vjedhura gjatë sulmeve kibernetike për të porositur pajisje kompjuterike dhe produkte elektronike nga dyqane të specializuara.

Mallrat më pas merreshin nga ndërmjetës dhe rishiteshin. Fitimet i kalonin organizatorëve ose përdoreshin për financimin e aktiviteteve të tjera të paligjshme.

Deri më tani, 68 persona të dyshuar për përfshirje në këtë veprimtari janë raportuar tek autoritetet përkatëse.

Arrestohen tre organizatorë të dyshuar

Gjatë hetimit, policia ka arrestuar tre persona të dyshuar si organizatorët kryesorë të skemës: një shtetas portugez 24-vjeçar dhe dy shtetas zviceranë 23-vjeçarë. Të tre jetojnë jashtë kantonit të Friburgut.

Hetimet kanë treguar se të dyshuarit jo vetëm që kanë financuar qëndrime në hotele dhe udhëtime duke përdorur të dhëna bankare të vjedhura, por kanë kryer edhe disa transferta të dyshimta dhe mashtruese të parave.

Hetimi vijon, ndërsa autoritetet po punojnë për të sqaruar plotësisht rolin e personave të përfshirë dhe përmasat e aktivitetit kriminal.