Shkurtohet afati për pasaportën zvicerane në disa kantone

Në kantonet St. Gallen dhe Uri, zbatimi i ligjit të rishikuar do të sjellë lehtësime të dukshme për të huajt që duan të marrin shtetesinë zvicerane

Foto Ilustrim

Me ligjin e rishikuar federal, koha që kantonet e përcaktojnë si të nevojshme për natyralizimin e të huajve (dhënie të pasaportës zvicerane) duhet të jetë në mes 2 dhe pesë vjet e gjatë. Shumica e kantoneve nuk do të ketë problem me këtë kufizim pasi që tashmë e kanë pasur të rregulluar në nivel kantoni një afat të tillë.

Por, janë shtatë kantone, shumica në zonën lindore të vendit, të cilat afatet në fjalë i kanë më të gjata dhe duhet të ndryshojnë bazën ligjore të tyre në përputhje me atë që e jep ligji në nivel nacional, shkruan sda.ch.

Kështu, kantoni St. Gallen deri tash si kusht për të dhënë shtetësinë e ka qëndrimin tetë vjeçar në këtë kanton, kantoni Appenzell-Ausserrhoden, më së paku tre vjet dhe ai Appenzell-Innerrhoden, minimalisht pesë vjet, transmeton albinfo.ch. Në Thurgau duhet pasur së paku 6 vjet qëndrim, ashtu si dhe në kantonet: Glarus, Graubünden, Nidwalden dhe Solothurn.

Ndërsa rekordin në këtë drejtim e mban kantoni Uri, në të cilin, për të bërë kërkesën për natyralizim, i huaji duhet t`i ketë së paku dhjetë vjet qëndrim në atë kanton! Për këtë arsye në kantonet St. Gallen dhe Uri, zbatimi i ligjit të rishikuar do të sjellë lehtësime të dukshme për të huajt që duan të marrin shtetesinë zvicerane, shkruajnë mediet zvicerane.

Ekzekutivi i Kantonit St. Gallen me këtë rast ka propozuar që në ligjin kantonal për natyralizim të vihet afati prej pesë vitesh qëndrimi në kanton si kusht. Krahas kësaj, ai që dëshiron të natyarilzohet duhet që në dy vitet e fundit të ketë jetuar pa ndërprerje në të njëjtën komunë, përcjell albinfo.ch. Ndryshimi i ligjit tashmë është në duart e parlamentit të Kantonit, të cilit i është dhënë për konsultim.

Pasi që edhe ligji përkatës në nivel nacional ende nuk ka hyrë në fuqi, kantonet kanë ende kohë për të bërë përshtatjet e nevojshme.

Ligji i ri parasheh, veç tjerash, që ata të cilët duan të natyralizohen, duhet të kenë jetuar së paku 10 vjet në Zvicër, ndërsa në ligjin e vjetër parashiheshin 12 vjet.

Ligji i ri pritet të hyjë në fuqi jo para fillimit të vitit 2017.