Shoqata “Naim Frashëri” në Austri kremtoi Festën e Flamurit me program kulturo-arsimor

Shoqata e Mësuesve Shqiptarë “Naim Frashëri” në Austri organizoi sot një program të pasur kulturo-arsimor me nxënësit që mësojnë gjuhën shqipe, në nder të Festës së Flamurit.

Nxënësit e mësuesve Miradije Berishaj, Osman Ademi, Desara Gjonej dhe Ibrahim Hasanaj performuan valle burimore, recitime, drama dhe monologje, duke sjellë mesazhe për ruajtjen e traditës dhe lidhjen me kulturën shqiptare. Çdo aktivitet u shoqërua me emocione dhe nostalgji për atdheun, ndërsa dramat dhe recitimet përçuan mesazhin se kultura është një urë që lidh të kaluarën me të tashmen.

Programi u moderua nga kryetari i Shoqatës, Osman Ademi, ndërsa mësuesit e tjerë kontribuan në përgatitjen dhe realizimin e aktivitetit.

Shoqata falenderon Ambasadën e Republikës së Kosovës në Austri për mbështetjen, veçanërisht për mbulimin e sallës, si dhe Halil Jasharin për dokumentimin fotografik të aktivitetit. Mirënjohje u shpreh edhe për nxënësit, prindërit, kolegët dhe mysafirët që morën pjesë në ngjarje.

Ngjarja vuri në pah rëndësinë e artit dhe arsimit në ruajtjen e identitetit dhe traditës shqiptare, edhe për brezat e rinj që jetojnë jashtë vendit.