Shpend Ahmeti “kritikon” Qeverinë për ndarjen e mjeteve për Notre Dame

EPA/IAN LANGSDON

Ditë më parë katedralja Notre Dame në Paris u përfshi nga flakët.

Shumë vende, institucione, personalitete e drejtues të shteteve të botës shprehën aolidaritet me me Francën për djegien e katedrales.

Qeveria e Kosovës gjatë ditës së sotme ka ndarë mjete për të kontribouar në ndërtimin e katedrales Notre Dame.

Por dhënien e mjeteve e ka kritikuar kryetari i Prishtinës, Shpend Ahmeti.

Me anë të një postimi në Facebook, Ahmeti ka thënë se Kosova i ka dëshmuar Francës miqësinë në forma të tjera, ndërsa paratë e ndara nga Qeveria e Kosovës, sipas tij, mund të ndaheshin për familjet me raste të veçanta në Kosovë.

“Qeveria e Kosovës paska ndarë mjete për Katedralen e Notre Dame.  Përderisa kjo tragjedi ka prekur gjithë botën e edhe Kosovën, po ashtu ka ngjallur edhe solidaritet gjithandej.  Duke parë lajmet botërore shihet që paratë nuk do të jenë problemi i riparimit të katedrales, e cila me shpresë do të renovohet shpejtë. Fondet të cilat qeveria i ka ndarë do të ishte mirë t’i ridestinojë për strehim dhe renovim të shtëpive të disa rasteve të rënda sociale.  Së fundmi kemi pas disa djegie të shtëpive në disa komuna si pasojë e fatkeqësive dhe familjet nuk kanë mundësi me i riparu.  Për komunë të Prishtinës mund të ofrojmë informata. Francës ja kemi dëshmu miqësinë dhe solidaritetin dhe besoj se e dijnë që e kemi sinqerisht dhembjen, dhe kjo nuk përmirësohet me para.  Por, qytetarit tonë, shteti ka nevojë t’i tregojë edhe solidaritetin edhe përkujdesjen”, ka shkruar Ahmeti.