Shpresa vetëm në qymyr

Prodhimi i energjisë në Kosovë do të bazohet krejtësisht nga qymyri, që është kundër standardeve të BE-së.

Ministri Besim Beqaj ka deklaruar se energjia alternative ka kosto pesëfish më të lartë dhe se mungojnë burimet. Nuk ka ujë të mjaftueshëm, e as erë. Ndërkaq, ekzistojnë më se 12 miliardë tonë qymyr, që garanton rrymë për 40 vjet, shkruan Express.

Pavarësisht standardeve që kërkon BE-ja për energji alternative, Qeveria e Kosovës të ardhmen energjetike të vendit e sheh krejtësisht të bazuar në qymyr.

Arsyetimi është se mungojnë kapacitetet për energji të ripërtërishme dhe për shkak se prodhimi i saj ka kosto shumë të lartë, që detyrimisht do ta rriste edhe çmimin e tarifave.

Nga shoqëria civile një konkludim i tillë nuk mund të jetë i saktë, përderisa deri sot nuk është bërë asnjë hulumtim, i cili do të sqaronte se sa ka kapacitete Kosova për prodhim të energjisë nga uji apo era.Për me tepër, deputetet kanë kërkuar sqarime se pse nuk po u krijohen kushte më të favorshme investitorëve që duan të investojnë në prodhimin e energjisë nga burimet alternative.

Ministri Beqaj ka thënë se sa i përket kësaj, Qeveria vetëm është duke e zbatuar Strategjinë e Energjisë për periudhën 2009-2018.